Bota

Pence zotohet të mos e lejojë Iranin të pajiset me armë bërthamore

Washingtoni zyrtar asnjëherë nuk do ta lejojë Iranin të pajiset me armë bërthamore, tha zv/presidenti i SHBA-ve, Mike Pence, pasi u raportua se Teherani ka shkelur nivelin e pasurimit të uraniumit të përcaktuar nga marrëveshja ndërkombëtare.

Duke folur para qindra mbështetësve në konferencën e Krishterëve të Bashkuar për Izraelin (CUFI), Pence tha se Shtetet e Bashkuara “do të vazhdojnë të kundërshtojnë influencën e rrezikshme të Iranit” dhe se “Amerika nuk do ta lejojë kurrë Iranin të pajiset një armë bërthamore”.

Të hënën, një zyrtar iranian njoftoi se Teherani filloi pasurimin e uraniumit në nivelin 4.5 për qind, që është më i lartë se kufiri prej 3.67 për qind i përcaktuar nga marrëveshja bërthamore.

Një zëdhënës i Organizatës së Energjisë Atomike të Iranit tha se pasurimi në nivelin 20 për qind është faza e tretë në zvogëlimin e obligimeve të Iranit në raport me marrëveshjen e vitit 2015.

Megjithatë, kreu i Gardës Revolucionare të Elitës të Iranit, Gjenerali Hossein Salami, raportohet të ketë thënë se bota e di se Irani nuk po kërkon armë bërthamore.

Sipas agjencisë gjysmë-shtetërore të lajmeve Tasnim, ai ka thënë se armët bërthamore nuk kanë vend në Islam dhe se fetë kurrë nuk do të miratojnë përdorimin e armëve të shkatërrimit në masë.

Sipas marrëveshjes bërthamore me Iranin, të nënshkruar nga Britania e Madhe, SHBA, Rusia, Kina, Franca, Gjermania dhe Bashkimi Evropian, Irani është pajtuar të shkatërrojë rezervat e uraniumit gjysmë të pasuruar dhe të zvogëlonte rezervat e saj të uraniumit me pasurim të dobët për 98 për qind.

Pence gjithashtu paralajmëroi Iranin, duke thënë se nuk duhet të keqinterpretojë vendimin për tërheqjen nga sulmi pasi Teherani rrëzoi një mjet fluturues amerikan muajin e kaluar.

“Më lejoni të jem i qartë,” tha ai. “Irani nuk duhet të ngatërrojë përmbajtjen amerikane me mungesën e vendosmërisë amerikane”.

Tensionet midis dy vendeve janë në rritje prej se Trump braktisi marrëveshjen bërthamore në vitin 2018 dhe SHBA-të që atëherë filluan një fushatë diplomatike dhe ekonomike për të ushtruar presion mbi Iranin për të rinegociuar marrëveshjen.

Si pjesë e fushatës së saj, SHBA-të kanë ri-vendosur sanksione mbi eksportet e naftës së papërpunuar iraniane, që ka shkaktuar rënie të fuqishme të ekonomisë së Iranit.

Sekretari amerikan i Shtetit, Mike Pompeo, gjithashtu pati fjalim gjatë konferencën CUFI, duke sulmuar Iranin dhe duke kritikuar liritë fetare në këtë vend.

“Përndjekja e besimtarëve është veçanërisht intensive brenda Republikës Islamike të Iranit”, tha ai.

“Ajetollahët kanë privuar popullin iranian nga ajo e drejtë bazike, e thjeshtë, themelore e njeriut. E drejta për adhurim”, shtoi ai./trt

OPINIONE