Presidenti i Republikës Çeçene, Ramzan Kadyrov ka deklaruar se megjithëse ka ende energji për të drejtuar vendin, ka ardhur koha që ai të dalë në pension, sepse siç thotë për mediat ruse, rajoni ka hyrë në një fazë të re të zhvillimit.
Në intervistë, Kadyrov tha se po ëndërronte për daljen në pension, sepse puna e tij si kreu i Republikës Çeçene ishte shumë e vështirë dhe kishte shumë përgjegjësi.
“Mendoj se ka ardhur koha. Më parë, kishte një nevojë për mua kundër luftërave, për të sjellë rend. Por sot kemi rend, respekt dhe mirëkuptim në shoqëri dhe në Rusi. Kjo manifestohet, para së gjithash, nga fakti se ne jemi të njohur si qytetarë rusë”, tha ai.
Lidhur me preferencat e tij për një pasardhës, Kadyrov tha se kishte disa njerëz, por nuk pranoi të fliste konkretisht, siç ndodh me shumë politikanë. Ai vuri në dukje se vendimi përfundimtar duhet të bëhet në nivelet më të larta dhe shprehu gatishmërinë e tij për të kryer ndonjë urdhër që vjen nga Moska.
Kadyrov tha gjithashtu se ishte “kënaqësi” për të që të ishte nën sanksionet e disa shteteve të huaja. “Nëse ka disa sanksione kundër meje – këto nuk janë mbi vjedhjet apo korrupsionin ose për zbulimin e disa sekreteve. Unë jam nën sanksione për shtetin tim dhe popullin tim dhe ata nuk më lëndojnë në asnjë mënyrë”, i tha ai Rossiya 1.
