Në votimin e mbajtur gjatë seancës plenare të Dhomës së Përfaqësuesve me shumicë demokrate, p/rezoluta në fjalë u miratua me 248 vota pro dhe 177 kundër.
Adresa e radhës së p/rezolutës do të jetë Senati, dhoma e lartë e Kongresit amerikan.
Sipas medias në SHBA, në rast se merr edhe mbështetjen e Senatit, ku gjasat që të miratohet janë të mëdha, drafti i Rezolutës së Fuqive të Luftës (War Powers Resolution) – pjesërisht edhe një përgjigje ndaj vrasjes së gazetarit Jamal Khashoggi nga Arabia Saudite – do të shkojë në tryezën e Presidentit Trump, i cili ka të ngjarë të përdorë veton.
Kjo p/rezolutë parashikon ndërprerjen brenda 30 ditëve të mbështetjes për të gjitha njësitë e administratës Trump dhe për sulmet ajrore nën udhëheqjen e Arabisë Saudite në Jemen, për sa kohë që nuk luftojnë me Al-Kaidën.
Nëse miratohet edhe në Senat, ky projektligj për Jemenin do të jetë hapi më i qartë dhe më konkret që synon politikat e Trumpit për Jemenin dhe Arabinë Saudite.
Media amerikane thekson se kreu aktual i Shtëpisë së Bardhë, i cili nuk e ka ushtruar asnjëherë të drejtën e vetos gjatë mandatit të tij presidencial, mund ta përdorë atë për herë të parë pikërisht kundër p/rezolutës për Jemenin.
Rezoluta e Fuqive të Luftës, e cila ka si qëllim t’i japë fund rolit të administratës së Shteteve të Bashkuara të Amerikës në luftën e Jemenit, qe dërguar në Senat nga ligjvënësit Bernie Sanders, Mike Lee dhe Chris Murphy, kurse në Dhomën e Përfaqësuesve nga kongresmenët Ro Khanna, Mark Pocan dhe Pramila Jayapal./ trt
