Ambasadori i Sirisë në Moskë, Riad Haddad ka thënë se prindërit sirianë po u vënë fëmijëve të tyre emrin e Presidentit rus si një shenjë mirënjohjeje, ndërsa miliona studentë, duke përfshirë edhe fëmijët e Bashar Asadit po mësojnë rusisht.
“Falë përpjekjeve të ambasadës së Moskës, dhe me miratimin e Presidentit Asad, rusishtja është gjuha e dytë që mësohet në shkollat siriane. Ne kemi hapur fakultete ruse në të gjitha universitetet e vendit, ndërsa fëmijët marrin mësim nga klasa e shtatë”, tha zyrtari, duke iu drejtuar dhomës së sipërme të parlamentit të Rusisë, Këshillit të Federatës, në Moskë.
Rusia u vendos për herë të parë në kurrikul në shkollat e kontrolluara nga qeveria në vitin 2014, dhe është caktuar me prioritet që nga ajo kohë.
“Mësimi i gjuhës ruse në vend është një gjest mirënjohjeje për popullin rus nga Siria”, tha Haddad, i cili ka qenë në këtë post që nga shpërthimi i konfliktit sirian në vitin 2011.
“Shumë familje i kanë quajtur madje djemtë e tyre Putin. Dhe nuk është sekret që fëmijët e Presidentit po mësojnë gjuhën ruse”, tha zyrtari.
Edhe pse Rusia kohët e fundit ka rritur mbështetjen e saj për qeverinë siriane, marrëdhëniet e saj strategjike me Damaskun i detyrohen kohës sovjetike, dhe shumë zyrtarë të lartë të Damaskut, përfshirë vetë Haddadin, janë arsimuar në Rusi ose si studentë të huaj ose oficerë ushtarakë.
Rusia ka mbajtur një bazë detare në Tartus që nga vitet 1970, dhe megjithëse marrëdhënia diplomatike midis dy vendeve u dobësua pas rënies së komunizmit dhe rikthimit të prezencës ndërkombëtare të Moskës, baza, krahas një objekti ajror në Khmeimim të ndërtuar në vitin 2015, kanë luajtur një rol kyç në konflikt.
Ndërkohë, tradita e emërtimit të fëmijëve pas mbiemrave të liderëve dhe termave të tjerë ideologjikë filloi të zinte rrënjë në Bashkimin Sovjetik të hershëm, ku emra të tillë si Vladlen (Vladimir Lenin) dhe Elem (Engels, Lenini, Marx) u bënë të njohur.
Ka patur mbulim të gjerë mediatik për shqiptarët e Kosovës me emrin Toni dhe Tonibler, prej ish-Kryeministrit të Mbretërisë së Bashkuar që mbështeste shtetësinë e tyre, por fati i fëmijëve të quajtur Xhorxh Bush pasi koalicioni i udhëhequr nga SHBA-ja rrëzoi Saddam Husseinin në Irak mbetet i padokumentuar. Janë disa raporte të fëmijëve që më vonë u riemëruan, pasi ish-presidenti amerikan e humbi emrin e mirë. / © Gazeta Impakt
