Ndërsa ofensiva disamujore e Izraelit në Gaza po vazhdon, të paktën 41 palestinezë u vranë dhe disa të tjerë u plagosën sot në dy sulme izraelite në qytetin e Gazës. Burime mjekësore thanë për Anadolu se ushtria izraelite shënjestroi një shtëpi në lagjen Al-Tuffah në lindje të qytetit të Gazës, duke vrarë 17 palestinezë dhe duke plagosur disa të tjerë.
Ata thanë gjithashtu se 24 palestinezë të tjerë u vranë dhe dhjetëra u plagosën në një bombardim shtesë izraelit në kampin e refugjatëve Al-Shati në perëndim të qytetit të Gazës. Ushtria izraelite bombardoi tri ndërtesa banimi në kamp, raporton Anadolu nga terreni.
Dëshmitarët okularë thanë për Anadolu se më shumë se 20 shtëpi në zonën e shënjestruar u shkatërruan plotësisht ose pjesërisht si rezultat i bombardimeve izraelite. Ndërkohë, ushtria izraelite pretendoi se ka bombarduar ndërtesat e përdorura nga Hamasi si seli ushtarake në qytetin e Gazës, pa dhënë asnjë provë apo detaje të mëtejshme.
Izraeli, duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, ka vazhduar ofensivën e tij brutale në Gaza që nga sulmi i 7 tetorit 2023 nga grupi palestinez Hamas. Mbi 37.500 palestinezë janë vrarë që atëherë në Gaza, shumica prej tyre gra dhe fëmijë, dhe më shumë se 86.000 të tjerë janë plagosur, sipas autoriteteve lokale shëndetësore.
Mbi tetë muaj pas fillimit të luftës izraelite, pjesë të mëdha të Gazës janë në gërmadha, krahas një bllokade gjymtuese të ushqimit, ujit të pastër dhe ilaçeve. Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit e urdhëroi atë të ndalonte menjëherë operacionin e tij në qytetin jugor Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj./AA
