Agjencia Turke për Bashkëpunim dhe Koordinim (TIKA) ka kontribuar në përmirësimin e kushteve dhe shërbimeve në Qendrën e Shërbimeve Sociale në Bashkinë e Kukësit, duke ofruar mobilimin dhe pajisje të ndryshme.
TİKA, në kuadër të projekteve në lidhje me zhvillimin e infrastukturës sociale në Shqipëri, ndihmoi me pajisje mobiljare në Qendrën e Autizmit, themeluar në qytetin e Kukësit nga kryetarja e Fondacionit të Fëmijëve Shqiptarë, njëkohësisht bashkëshortja e ish-kryeministrit Sali Berisha, znj. Liri Berisha.
TIKA ka ofruar për këtë qendër mobiliet, pajisjet e kuzhinës, pajisje elektronike dhe lodra për ambient të jashtëm dhe të brendshëm. 
Nga ky projekt do të përfitojnë kryesisht fëmijët autikë të qendrës.
Në aktivitetin e organizuar për inaugurimin ishte i pranishëm edhe kryetari i Bashkisë së Kukësit, Bashkim Shehu, i cili shprehu mirënjohje për shtetin turk që ka kontribuar për këtë qendër.
“Jemi mirënjohës për kontributin. Është një bashkëpunim shumë i përkryer ndërmjet autoriteteve turke. Kjo qendër po fillon të ju shërbejë qytetarëve, nënave që kanë nevojë. Në qendër ofrojmë shërbime fëmijëve tanë me probleme të ndryshme, jo vetëm në fushën e autizmit. Besoj se nënat e Kukësit nuk do ta harrojnë kurrë këtë të mirë që është bërë për qytetin e Kukësit“, tha Shehu.
Ambasadori i Turqisë në Tiranë, Murat Ahmet Yörük, tha gjatë aktivitetit se TIKA në të gjithë Shqipërinë realizon projekte në sektorë të ndryshëm.
“Do të vazhdojmë edhe në të ardhmen duke qenë afër njëri-tjetrit. Kemi shumë vlera të përbashkëta dhe duke marrë frymëzim nga këto vlera, është diçka që buron nga zemra jonë që të vazhdojmë të hedhim firmën në realizimin e projekteve konkrete, kaq të suksesshme. Sot, TIKA në të gjithë Shqipërinë, jo vetëm në fushën e arsimit, por edhe në projektet e shëndetësisë, infrastrukturës, fushën e bujqësisë, dhe për mbrojtjen e trashëgimisë tonë kulturore të përbashkët, realizon projekte. Sot jemi mbledhur për projektin që ka të bëjë me mobilimin e qendrës sociale, që do të jetë e vlefshme për fëmijët autikë“, u shpreh ambasadori turk.
Kryetarja e Fondacionit të Fëmijëve Shqiptarë, Liri Berisha, në fjalën e saj përshendetëse tha; “…Fondacioni i Fëmijëve Shqiptarë është themeluar në vitin 1996 dhe krahas misioneve të shumtë që ka marrë përsipër nga viti 2008 është fokusuar në sëmundjen e autizmit. Qëllimi jonë është ngritja e disa qendrave të këtilla në të gjithë vendin, dhe me asistencën e TİKA-s ne kemi arritur një nga këto qëllime ku dua të theksoj faktin që me këtë projekt ne do i shërbejmë njëkohësisht edhe qytetarëve nga Kosova, Maqedonia dhe Mali i Zi…”./ trt
