Bota

Zëdhënësja e Ministrisë së Jashtme ruse e krahason takimin e Vuçiçit me Trumpin me skenën nga “Pasionet e ulëta”

Zëdhënësja e Ministrisë së Punëve të Jashtme të Rusisë, Maria Zakharova, në rrjetet sociale ka publikuar presidentin e Serbisë, Aleksandër Vuçiç gjatë takimit me presidentin e Shteteve të Bashkuara të Amerkës, Donald Trump, në Shtëpinë e Bardhë dhe e ka krahasuar me skenën nga filmi “Pasionet e ulëta”, me aktoren kryesore Sheron Stone, në të cilën ajo ulet këmbë mbi këmbë.

“Në qoftë se jeni thirrur në Shtëpinë e Bardhë, ndërkaq karrigia është e vendosur sikur po ju marrin në pyetje, uleni sikurse në fotografinë numër dy, kushdo që jeni. Më besoni”, ka shkruar Zakharova.

Duke reaguar ndaj këtij publikimi, drejtori i Zyrës për Kosovën i Qeverisë së Serbisë, Marko Gjuriq, e ka porositur Zakharovan se “nuk do t’ia lejojë që ta sulmojë Serbinë”.

Në reagimin e tij, ndaj publikimit të Zakharovas në rrjetet sociale, Gjuriq e ka porositur zëdhënësen e Ministrisë së Jashtme të Rusisë, se duhet “të turpërohet”.

Ai ka theksuar që Vuçiq nuk ka folur asnjë fjalë të keqe kundër Rusisë, “madje as në atë vend (në Shtëpinë e Bardhë).

“Ndërkaq, paramendojeni që ky president ka pritur për t’u pranuar te presidenti rus madje edhe nga 1 orë e gjysmë dhe asnjëherë nuk ka kërkuar karrige të veçantë.

Unë nuk ju lejoj që ta sulmoni Serbinë krenare. Turp ju qoftë”, ka shkruar Gjuriq në rrjetet sociale.

Ministri i Mbrojtjes i Serbisë, Aleksandër Vulin, ka thënë që zëdhënësja e Ministrisë së Punëve të Jashtme të Rusisë “ i ka ofenduar të gjithë ata që e mbrojnë edhe Rusinë në Serbi”.

Duke reaguar në publikimin e zëdhënëses së Ministrisë së Jashtme të Rusisë, Maria Zakharova, Vulin ka shtuar që “ Vuçiqi, popullin e tij dhe miqtë e popullit të tij, asnjëherë nuk i ka braktisur, as nuk i ka ofenduar dhe as poshtëruar”.

“Zakharova na ka ofenduar të gjithë neve që e mbrojmë edhe Rusinë edhe Serbinë në vende më të vështira se sa në publikimet e saj në rrjetet sociale.

Armiqtë e Serbisë dhe Rusisë janë të gëzuar sot me dashakeqësinë e vogël të Zakharovas. Pas Vuçiçit mbeten veprat, pas Zakharovës dashakeqësia për të cilën do t’i vijë turp”, ka thënë Vulin përmes një deklarate.

Ai ka shtuar që “Vuçiq është burrështetasi i vetëm në Evropë, i cili ka refuzuar që t’i vendosë sanksione Rusisë, si është komandanti suprem i ushtrisë, me të cilën forcat e Federatës Ruse kanë bashkëpunimin më të madh dhe më të frytshëm”.

Vulini theksoi që “ madhështia e njeriut nuk matet me madhësinë e karriges në të cilën ulet e as me madhësinë e fuqisë në emër të së cilës flet, po me madhështinë e guximit që në secilën karrige ta mbrojë popullin dhe miqtë e popullit të vet”.

Kosova dhe Serbia, më 4 shtator, në Shtëpinë e Bardhë kanë nënshkruar një marrëveshje për normalizimin e marrëdhënieve ekonomike.

Në ceremoninë e nënshkrimit ka qenë i pranishëm edhe presidenti amerikan, Donald Trump.

“Pas shumë vitesh, dekadash të historisë tragjike dhe të dhunshme, si dhe të viteve të bisedimeve të dështuara, administrata ime propozon një mënyrë të re për tejkalimin e ndryshimeve, duke u fakusuar në krijimin e vendeve të punës dhe rritjes ekonomike”, ka thënë Trump, duke e cilësuar marrëveshjen si një përparim i madh, i cili “botën e ka bërë më të sigurtë”.

Trump gjithashtu ka theksuar që është krenar me liderët e Serbisë dhe Kosovës, (presidentin Aleksandër) Vuçiqin dhe (kryeministrin Avdullah) Hotin, të cilët kanë vënë nënshkrimet e tyre në marrëveshje.

Të hënën, më 7 shtator, presidenti i Serbisë, Vuçiq dhe kryeministri i Kosovës, Hoti, do të takohen sërish në Bruksel për të mbajtur një raund të ri të dialogut të lehtësuar nga Bashkimi Evropian, në nivelin më të lartë politik./Express

OPINIONE

INTERVISTA