BAGDAD – HAYDAR HADI – Fatih Yildiz, ambasadori i Turqisë në Bagdad, arrin të tërheq vëmendjen jo vetëm me aktivitetet e tij diplomatike në një ndër kryeqytetet më të rrezikshme të botës, por gjithashtu edhe me marrëdhëniet e ngushta të cilat ai i ka krijuar me njerëzit.
Ambasadori Yildiz është duke zhvilluar “diplomaci publike” në Bagdadin e përfshirë nga dhuna. Krahas aktiviteteve të tij të misionit diplomatik, ai pjesën më të madhe të kohës e kalon në rrugët e Bagdadit, duke komunikuar me irakianët nga sektorë dhe shtresa të ndryshme.
Për Anadolu Agency ai tregon mbështetjen dhe rëndësinë që Turqia ia kushton këtij vendi dhe popullit të tij, duke shtuar se me njerëzit mundohet të komunikojë me anë të disa fjalëve në gjuhën arabe.
Ky aktivitet i “jashtëzakonshëm” i ambasadorit që thyen fytyrën e ftohtë të politikës, gjithashtu u jep shpresa irakianëve të lodhur nga dhuna.
“Një turk dhe diplomat turk nuk ka mundësi që veten ta ndiejë si të huaj në Bagdad. Turqit që gjenden në çdo vend të Irakut shumë shpejt mund të krijojnë lidhje dhe të komunikojnë me njerëzit. Kjo e imja është reflektim i kësaj”, thotë Fatih Yildiz, të cilin irakianët quajnë “habbab”, që në gjuhën lokale do të thotë “i dashur”, dhe “modest”.
Duke krijuar lidhje të afërta me njerëzit, ai thotë se mundohet të tregojë se luftërat dhe dhimbjet nuk i kanë marrë peng Bagdadin dhe irakianët.
Yildiz, i cili mundohet që të shëtisë çdo skaj të Bagdadit, thotë se ndien kënaqësi të madhe nga kjo gjë. Ai ka edhe një numër të madh të ndjekësve irakianë në rrjetet sociale. Yildiz rizbulon vendet që asnjë zyrtar shtetëror nuk i viziton në Bagdad dhe përpiqet t’i rigjallërojë këto vende që kanë rëndësi për jetën shoqërore.
Kryeministri i Irakut, Haider al-Abadi, lidhur me ritmin e punës së tij ka thënë: “Ju vlerësoj, kujdesuni për veten”. Yildiz thekson se ky koment është mesazh për Turqinë dhe popullin turk.
Ambasadori Yildiz gjithashtu nuk harron edhe ata që janë strehuar në Bagdad për shkak të sulmeve të organizatës terroriste DEASH. Ndihmat e Agjencisë Turke për Bashkëpunim dhe Koordinim (TIKA) dhe të Gjysmëhënës së Kuqe ai ua dorëzon me duart e tij.
Ambasada e Turqisë në këtë vend gjendet në rajonin Vezirijje, që ëshë jashtë Rajonit të Gjelbërt ku gjenden përfaqësitë vendeve të shumta.
Ambasadori Yildiz bashkë me bashkëshorten e tij shëtit nëpër Vezirijje dhe blen gjërat e nevojshme nga furra, mishtorja e këtij vendi. Bashkëshortja e tij Nesrin Yildiz është mbështetësja më e madhe e tij. “Edhe pse jemi diplomuar nga i njëjti drejtim, për shkak të dashurisë që kam ndaj tij, pa filluar karierrën time vendosa të jem pranë tij”, thotë Nesrin Yildiz.
Yildiz gjithashtu edhe me policët e caktuar nga qeveria irakiane për sigurinë e tij ka krijuar një komunikim dhe lidhje shoqërore. Yildiz ishte përfaqësues i parë i misionit të huaj në Bagdat që ka festuar Festën e Policisë së Irakut duke u dhuruar atyre karafilë.
Në ambasadë gjenden pjesëtarë të njësisë speciale. Ambasadori punën e tyre e vlerson pozitivisht, duke thënë: “Këtu kemi 30 luanë që na mbrojnë ne këtu”.
Një prej tyre thotë se fakti që ambasadorin e kanë afër dhe është pjesë popullatës, vetëdijen mbi përgjegjësinë tyre e rrit në nivele shumë më të larta. Ndërkaq, një tjetër thotë se të punosh me ambasadorin është përvojë e ndryshme.
