Bota duhet ta dijë të vërtetën “para se të jetë tepër vonë”, thotë Presidenti Rexhep Tajip Erdogan
Turqia do t’u kërkojë inspektorëve ndërkombëtarë të përcaktojnë nëse Izraeli ka armë bërthamore, njoftoi të shtunën Presidenti Rexhep Tajip Erdogan.
Duke folur me gazetarët në fluturimin e tij në shtëpi nga Gjermania, udhëheqësi turk vuri në dukje se Izraeli është ndër vendet e pakta që nuk janë palë në Traktatin e vitit 1968 mbi Mospërhapjen e Armëve Bërthamore.
Erdogan tha se Ankaraja do t’i kërkojë Agjencisë Ndërkombëtare të Energjisë Atomike të hetojë nëse shteti hebre ka një arsenal bërthamor.
“Ecja përpara me këtë është shumë e rëndësishme në drejtim të balancimit të interesave strategjike në rajon. Ne do të vazhdojmë të ushtrojmë presion [mbi Izraelin]”, tha Erdogan. “Armët bërthamore të Izraelit duhet të inspektohen përtej çdo dyshimi përpara se të jetë tepër vonë. Ne do ta ndjekim këtë. Unë gjithashtu i bëj thirrje komunitetit ndërkombëtar që të mos e lërë këtë gjë”.
Edhe pse ekspertët besojnë gjerësisht se Izraeli mban një program të armëve bërthamore, vendi nuk e konfirmon apo mohon ekzistencën e tij.
Ministri i Trashëgimisë Amihai Eliyahu shkaktoi zemërim në të gjithë botën myslimane këtë muaj, kur ai hodhi idenë e hedhjes së një “bombë bërthamore” në Gaza. Kryeministri Benjamin Netahyau pezulloi ministrin nga mbledhjet e kabinetit pas komenteve të tij.
Erdogan ka kritikuar ashpër sjelljen e Izraelit në Gaza, duke e etiketuar atë një “shtet terrorist” dhe duke akuzuar Forcat Mbrojtëse të Izraelit për kryerjen e krimeve të luftës kundër palestinezëve. Netanyahu u përgjigj duke akuzuar presidentin turk për mbështetjen e “shtetit terrorist të Hamasit”.
Raundi aktual i dhunës midis Izraelit dhe Hamasit shpërtheu më 7 tetor kur militantët palestinezë sulmuan komunitetet izraelite, duke vrarë rreth 1200 njerëz, kryesisht civilë dhe duke marrë mbi 200 pengje. Izraeli u përgjigj me sulme ajrore dhe një pushtim tokësor të Gazës. Më shumë se 12,000 Gazanë janë vrarë nga bombardimet, sipas zyrtarëve lokalë./RT/GazetaImpakt
