Belgjika, Portugalia dhe Luksemburgu kanë njoftuar se do të mbyllen shkollat si masë paraprake kundër koronavirusit të ri.
Kryeministrja belge, Sophie Wilmes, në një konferencë për media tha se shkollat e vendit do të mbyllen që nga e premtja në mbrëmje deri më 3 prill.
Wilmes po ashtu tha se të gjitha aktivitetet kulturore e sportive janë anuluar dhe se vetëm tregjet e farmacitë do të qëndrojnë të hapura në vend.
Ndërsa, kryeministri i Portugalisë, Antonio Costa, në një konferencë për media tha se të gjitha shkollat dhe universitetet do të mbyllen deri më 9 prill.
Ndërkohë, ministrja e Shëndetësisë e Luksemburgut, Paulette Lenert, njoftoi se të gjitha shkollat në vend do të mbyllen nga 16 marsi deri më 27 mars.
Lenert shtoi se vendi ka konfirmuar 26 raste të koronavirusit.
Koronavirusi i ri, i njohur zyrtarisht si COVID-19, për herë të parë u shfaq në Wuhan të Kinës dhjetorin e kaluar dhe është përhapur në të paktën 114 vende.
Sipas Organizatës Botërore të Shëndetësisë (OBSH), e cila ka shpallur shpërthimin një pandemi, numri global i vdekjeve ka kaluar shifrën 4.900, me mbi 134 mijë raste të konfirmuara./AA